असोज २९, सुनसरी । सुनसरीको बराहक्षेत्र नगरपालिका वडा नं ९ मा ५ औं संस्करणको फुटबल प्रतियोगिता सयपत्री कप–२०७९ आयोजना हुने भएको छ ।
स्थानीय सयपत्री युथ क्लबको आयोजनामा कात्तिक १४ गतेदेखि २१ गते सम्म प्रतियोगिता आयोजना हुने बारेमा शुक्रबार पत्रकार सम्मेलनको आयोजना गरी जानकारी गराएको हो । प्रतियोगितामा सुनसरी र मोरङका क्लबहरु सहभागी हुनेछन् ।
क्लवका अध्यक्ष आशिष राईका अनुसार आयोजक सयपत्री युथ क्लव, सप्तकोशी युवा क्लव वराहक्षेत्र, पञ्चायन फुटबल क्लब रामधुनी, सालवनी युथ क्लव बराहक्षेत्र, फेयर फुटवल क्लब धरान, नेपाल पुलिस रानी, मिल्लत फुटवल क्लब कोशी, संगम यथ क्लव बराहक्षेत्रलाई प्रस्ताव गरिएको छ ।
प्रतियोगितामा विजेताले १ लाख ११ हजार १ सय ११ रुपैयाँ र उपविजेताले ५५ हजार ५ सय ५५ रुपैयाँ प्राप्त गर्ने छ । दैनिक खेलमा म्यान अफ दि म्याच र प्रतियोगिता भर विद्यागत उत्कृष्ट खेलाडीहरुलाई नगद र ट्रफी प्रदान गरिने आयोजकले जनाएको छ ।
उदयमान खेलाडीलाई प्रोत्साहन, खेल कौशल प्रस्तुतीसँगै दुव्यर्सनमुक्त समाजको निर्माण गर्ने उद्देश्यले प्रतियोगिता आयोजना गर्न लागिएको क्लवका सचिव प्रकाश लिम्बूले बताए । प्रतियोगिता सम्पन्न गर्न १५ लाख २५ हजार कुल लागत अनुमान गरिएको छ ।
