११ माघ, पथरी । पथरी शनिश्चरे नगर खेलकुद महोत्सव २०८० अन्तर्गत विहिबार भएको फुटबल खेलमा देविगन्ज एफसी विजयी हुँदै सेमिफाइनल प्रवेश गरेको छ ।
देविगन्जले प्रस्तावित पथरी रंगशालामा भएको दोस्रो चरणको दोस्रो खेलमा कल्याण एफसीलाई २–१ गोल अन्तरले पराजित गर्दै सेमिफाइनलको यात्रा तय गरेको हो ।
देविगन्जका निरज परियारले खेलको २१ औं मिनेटमा पहिलो गोलको खाता खोलेका थिए । त्यसपछि खेलको २७ औं मिनेटमा सनम धिमालले गोल गर्दै आफ्नो टिमलाई अग्रता दिलाएका थिए ।
खेलको दोस्रो हाफमा निक्कै उत्कृष्ट खेल प्रदर्शन गर्दै कल्याण एफ।सी।का सुरज याक्खाले ३० औं मिनेटमा गोल गरे । अन्ततः निर्धारित समयमा अन्य गोल थप्न नसक्दा कल्याण एफसी पराजित हुन पुगे ।
खेलको म्यान अफ द म्याच विजेता टिमका सन्जय लिम्बु घोषित भए । लिम्बुलाई वडा नं. ८ का वडाध्यक्ष तथा नगर प्रवक्ता नविन कार्कीले नगद रु २ हजार र ट्रफी प्रदान गरेका थिए ।
पथरी शनिश्चरे नगर खेलकुद विकास समितिको आयोजनामा जारी प्रतियोगिताको आजको पहिलो सेमिफाइनल खेल सिरिजंगा एफसी र युनिटी स्पोर्टस एफसी बीच हुने आयोजकका सदस्य सचिव नविन खुलालले जानकारी दिए ।
