विद्यानन्द चौधरी 
चैत १७ गते, कानेपोखरी । मोरङको कानेपोखरी गाउँपालिका – ५ जहदा रंगशालामा जारी अन्तर पालिका स्तरीय प्रथम अध्यक्ष कपमा बेलबारी फाइनलमा प्रवेश गरेको छ ।
विहिबार भएको सेमिफाइनल खेलमा बेलबारी नगरपालिकाले आयोजक कानेपोखरी गाउँपालिकालाई शुन्यको विरुद्ध १ गोलको अन्तरले पराजित गर्दै बेलबारी फाइनलमा प्रवेश गरेको हो । पहिलो हाफको १८ औं मिनेटमा बेलबारीका जर्सी न ७ का आदित्य तामाङले १ गोल गर्दै टिमलाई अग्रता दिलाएको थियो ।
दोस्रो हाफ पछिको खेलमा आयोजक कानेपोखरीले डी बक्स भित्र फ्रि किक हान्ने अवसर मिलेको थियो । निकै राम्रो अवसर पाए पनि फरवाड खेलेका एडिभिजनका खेलाडी डेनिम राईले त्यो अवसर सदुपयोग गर्न नसक्दा कानेपोखरीले हारव्यहोरर्नु पुग्यो । राईले हानेको फ्रि किक बेलबारीको गोल रक्षक सन्तोष दनुवारले सहजै बचाउ गरेका थिए । बेलबारीले निकै अवसरहरु गुमाएका थिए ।
बेलबारीका लागि जर्सी नम्बर १६ का भक्त बहादुर भण्डारीले पोष्ट नजिकबाट प्रहार गरेको बल पोष्ट बाहिर गएको थियो । त्यसैगरी जर्सी नम्बर १० का रन्जन मगरले वान भर्सेस वानमा पोष्ट एटममा गर्दा पोष्ट बाहिर जादा थप गोल लगाउने अवसरहरु गुमेका थिए ।
खेलको म्यान अफ दि म्याच बेलबारीका गोल रक्षक सन्तोष दनुवार घोषित भए । उनलाई खेल संयोजक चरण गुरुङले नगद १५ सय, ट्रफी र मेडल प्रदान गरेका थिए । भोलीको दोस्रो सेमिफाइनल खेल इटहरी उपमहानगरपालिका र लेटाङ नगरपालिका विच हुने आयोजक समितिका सदस्य मनोज अधिकारीले बताए ।
